2022 ടൊയോട്ട ഗ്ലാൻസ ഇന്ന് ഇന്ത്യയിൽ അവതരിപ്പിക്കും

ജാപ്പനീസ് (Japanese) വാഹന ബ്രാന്‍ഡായ ടൊയോട്ടയുടെ (Toyota Kirloskar Motor-TKM)പുതിയ മോഡല്‍ ഗ്ലാന്‍സ (2022 Glanza) ഇന്ന് ഇന്ത്യയിൽ അവതരിപ്പിക്കും. ഈ മോഡൽ അടിസ്ഥാനപരമായി പുതിയ മാരുതി സുസുക്കി ബലേനോയുടെ ബാഡ്‌ജ്-എഞ്ചിനീയറിംഗ് പതിപ്പാണ്. ഇരു ബ്രാൻഡുകളും തമ്മിലുള്ള ഒരു സംയുക്ത സംരംഭത്തെ അടിസ്ഥാനമാക്കിയുള്ള ആദ്യ മോഡലായിരുന്നു ഗ്ലാന്‍സ. 

2022 ടൊയോട്ട ഗ്ലാൻസ ഔദ്യോഗിക ലോഞ്ചിന് മുന്നോടിയായി ഡീലർഷിപ്പുകളിലേക്ക്

മോഡലിലേക്ക് വരുമ്പോൾ, നിലവിലെ മോഡലിനെ പോലെ, വരാനിരിക്കുന്ന ടൊയോട്ട ഗ്ലാൻസയും അടുത്തിടെ വിൽപ്പനയ്‌ക്കെത്തിയ പുതിയ മാരുതി ബലേനോയെ അടിസ്ഥാനമാക്കിയുള്ളതാണ്. ലോഞ്ച് ചെയ്യുന്നതിന് മുന്നോടിയായി പുത്തന്‍ ഗ്ലാന്‍സയുടെ ഇന്റീരിയർ, എക്സ്റ്റീരിയർ വർണ്ണ ഓപ്ഷനുകൾക്കൊപ്പം അതിന്റെ വേരിയന്റിനെയും എഞ്ചിൻ ലൈനപ്പിനെയും കുറിച്ചുള്ള വിശദാംശങ്ങൾ കഴിഞ്ഞ ദിവസങ്ങളില്‍ പുറത്തുവന്നു.

ഗ്ലാന്‍സയുടെ നിലവിലെ പതിപ്പ് G, V എന്നീ രണ്ട് വേരിയന്റുകളിൽ മാത്രമേ ലഭ്യമായിരുന്നുള്ളൂ. അത് ബലേനോയുടെ രണ്ട് മികച്ച വേരിയന്റുകളെ അടിസ്ഥാനമാക്കിയുള്ളതാണ്. എന്നിരുന്നാലും, പുതിയ ബലെനോയുടെ സിഗ്മ, ഡെൽറ്റ, സീറ്റ, ആൽഫ വകഭേദങ്ങളുമായി പൊരുത്തപ്പെടാൻ സാധ്യതയുള്ള ഇ, എസ്, ജി, വി എന്നീ നാല് വേരിയന്റുകളിൽ ടൊയോട്ട പുതിയ ഗ്ലാൻസ വാഗ്ദാനം ചെയ്യും.

പുതിയ സിംഗിൾ സ്ലാറ്റ് ഗ്രിൽ, എൽ-ആകൃതിയിലുള്ള എൽഇഡി ഡിആർഎല്ലുകളുള്ള പുതിയ എൽഇഡി ഹെഡ്‌ലാമ്പുകൾ, ഫോഗ് ലൈറ്റുകളും ബ്ലാക്ക് ഇൻസേർട്ടും ഉള്ള പുതിയ ബമ്പർ, പുതിയ ഡ്യുവൽ-ടോൺ അലോയ് വീലുകൾ എന്നിവയുൾപ്പെടെ വളരെയധികം അപ്‌ഡേറ്റ് ചെയ്ത ബാഹ്യ ഡിസൈൻ പുതിയ ടൊയോട്ട ഗ്ലാൻസയില്‍ അവതരിപ്പിക്കും. ഒപ്പം സ്പ്ലിറ്റ് LED ടെയിൽ ലൈറ്റുകളും റിഫ്‌ളക്ടറുകളുള്ള പുതിയ റിയർ ബമ്പറും നമ്പർ പ്ലേറ്റ് റിസെസ്സും വാഹനത്തിന് ലഭിക്കും. 

അകത്ത്, 2022 ടൊയോട്ട ഗ്ലാൻസയിൽ 360-ഡിഗ്രി ക്യാമറ, ഹെഡ്‌സ്-അപ്പ് ഡിസ്‌പ്ലേ (HUD), ആപ്പിൾ കാർപ്ലേ, ആൻഡ്രോയിഡ് ഓട്ടോ എന്നിവയ്‌ക്കൊപ്പം വലിയ ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, ഫ്ലാറ്റ്-ബോട്ടം സ്റ്റിയറിംഗ് വീൽ, പുനർനിർമ്മിച്ച ഇൻസ്ട്രുമെന്റ് കൺസോൾ, പിൻഭാഗം എന്നിവ സജ്ജീകരിച്ചിരിക്കുന്നു. എസി വെന്റുകൾ, ആറ് എയർബാഗുകളും വാഹനത്തിനുണ്ട്. 

വരാനിരിക്കുന്ന ടൊയോട്ട ഗ്ലാൻസയിൽ പുതിയ 1.2 ലിറ്റർ, നാല് സിലിണ്ടർ, ഡ്യുവൽ VVT പെട്രോൾ എഞ്ചിൻ ലഭിച്ചേക്കും എന്നും 89 ബിഎച്ച്പിയും 113 എൻഎം ടോർക്കും ഉൽപ്പാദിപ്പിക്കുമെന്നും പ്രതീക്ഷിക്കുന്നു. ട്രാൻസ്മിഷൻ ഓപ്ഷനുകളിൽ അഞ്ച് സ്പീഡ് മാനുവൽ യൂണിറ്റും എഎംടി യൂണിറ്റും ഉൾപ്പെടാൻ സാധ്യതയുണ്ട്.

കളർ ഓപ്ഷനുകളെ സംബന്ധിച്ചിടത്തോളം, ഗ്ലാൻസ അഞ്ച് ഷേഡുകളിൽ ലഭ്യമാണ്.  ചുവപ്പ്, നീല, ചാര, വെള്ള, സില്‍വര്‍ എന്നിവയാണവ. എന്നിരുന്നാലും ബലേനോയിൽ അധികമായി വാഗ്‍ദാനം ചെയ്യുന്ന ബീജ് ഷേഡ് പുതിയ ഗ്ലാന്‍സയ്‍ക്ക് ഉണ്ടാകില്ല എന്നാണ് റിപ്പോര്‍ട്ടുകള്‍. പുതിയ ബലേനോയിൽ കാണുന്ന കറുപ്പും നീലയും വ്യത്യസ്‍തമായി ഗ്ലാൻസയ്ക്ക് ഡ്യുവൽ-ടോൺ ബ്ലാക്ക്, ബീജ് ഇന്റീരിയർ കളർ സ്‍കീമും ഉണ്ടായിരിക്കും.

ബലേനോയിൽ നിന്ന് ഇത് എത്ര വ്യത്യസ്‍തമായിരിക്കും?
മുമ്പത്തെ ബലേനോ-ഗ്ലാൻസ ജോഡിയിൽ നിന്ന് വ്യത്യസ്തമായി, പുതിയതിന് കൂടുതൽ വ്യത്യസ്തമായ രൂപമായിരിക്കും. പുതിയ എൽ ആകൃതിയിലുള്ള എൽഇഡി ഡേടൈം റണ്ണിംഗ് ലാമ്പ് സിഗ്നേച്ചറുകൾ, 16 ഇഞ്ച് അലോയ് വീലുകൾക്കുള്ള പുതിയ ഡിസൈൻ എന്നിവയ്‌ക്കൊപ്പം കാമ്രി പോലുള്ള ഗ്രില്ലും ബമ്പറും കൂടുതൽ ക്രോം ഘടകങ്ങളും സഹിതം ഗ്ലാൻസയുടെ ടീസർ ചിത്രങ്ങൾ സവിശേഷമായ മുൻഭാഗത്തെ സൂചന നൽകുന്നു. 

എങ്കിലും, ഉള്ളിൽ, മുകളിൽ സൂചിപ്പിച്ച വ്യത്യസ്‌ത വർണ്ണ സ്കീമുകൾ കൂടാതെ, ബലേനോ-ഗ്ലാൻസ ജോഡി പരസ്‍പരം വളരെ വ്യത്യസ്തമായിരിക്കുമെന്ന് പ്രതീക്ഷിക്കുന്നില്ല. ഇരുമോഡലുകൾക്കും സമാനമായ വേരിയന്റ് ലൈനപ്പ് ഉള്ളതിനാൽ, ഓരോ വേരിയന്റിലുമുള്ള ഉപകരണ ലിസ്റ്റും പരിചിതമാകുമെന്ന് പ്രതീക്ഷിക്കുന്നു. 

ലോഞ്ച് ചെയ്തുകഴിഞ്ഞാൽ, പുതിയ ഗ്ലാൻസ മാരുതി സുസുക്കി ബലേനോ, ഹോണ്ട ജാസ് , ഹ്യുണ്ടായ് ഐ20 , ടാറ്റ ആൾട്രോസ് , ഫോക്‌സ്‌വാഗൺ പോളോ എന്നിവയ്ക്ക് എതിരാളിയാകും .