രോഹിതിനും രാഹുലിനും അർധശതകം; കിവീസിനെ തകർത്ത് പരമ്പര സ്വന്തമാക്കി ഇന്ത്യ
Dhanesh 
ഇന്ത്യയും ന്യൂസിലൻറും തമ്മിലുള്ള രണ്ടാം ടി20 മത്സരം റാഞ്ചിയിൽ. ഒന്നാം ടി20യിൽ ഇന്ത്യ 5 വിക്കറ്റിന് വിജയിച്ചിരുന്നു. മൂന്ന് മത്സരങ്ങളാണ് പരമ്പരയിലുള്ളത്.
രണ്ടാം ടി20യിൽ ന്യൂസിലൻഡിനെ ഏഴ് വിക്കറ്റിന് തകർത്ത് പരമ്പര സ്വന്തമാക്കി ടീം ഇന്ത്യ. മൂന്ന് മത്സരങ്ങളുടെ പരമ്പരയിൽ ഇന്ത്യ 2-0ന് മുന്നിലെത്തിയിരിക്കുകയാണ്. നായകൻ രോഹിത് ശർമയും ഉപനായകൻ കെഎൽ രാഹുലും നേടിയ അർധശതകങ്ങളാണ് ഇന്ത്യയെ ആധികാരിക വിജയത്തിലേക്ക് നയിച്ചത്. രാഹുൽ 49 പന്തിൽ നിന്ന് 65 റൺസെടുത്തു. ആറ് ഫോറും രണ്ട് സിക്സറും അടങ്ങിയതാണ് ഇന്നിങ്സ്. മറുഭാഗത്ത് രോഹിത് 36 പന്തിൽ നിന്ന് 55 റൺസ് നേടി. അഞ്ച് സിക്സറുകളാണ് ആ ബാറ്റിൽ നിന്ന് പിറന്നത്. വെങ്കടേഷ് അയ്യരും (12), റിഷഭ് പന്തും (12) അനായാസം ടീമിനെ വിജയത്തിലെത്തിക്കുകയും ചെയ്തു.
154 റൺസ് വിജയലക്ഷ്യം.രണ്ടാം ടി20യിൽ ലഭിച്ച മികച്ച തുടക്കം കിവീസിന് മുതലാക്കാനായില്ല. 20 ഓവറിൽ 6 വിക്കറ്റ് നഷ്ടത്തിൽ 153 റൺസാണ് ടീം നേടിയത്. പവർപ്ലേയിൽ വെടിക്കെട്ട് പ്രകടനമാണ് ഓപ്പണർമാരായ മാർട്ടിൻ ഗപ്ടിലും ഡാരിൽ മിച്ചലും ചേർന്ന് നടത്തിയത്. ഗപ്ടിൽ 15 പന്തിൽ നിന്ന് 31 റൺസെടുത്തു. മിച്ചൽ 28 പന്തിൽ നിന്ന് 31 റൺസ് നേടി പുറത്തായി.
ഗ്ലെൻ ഫിലിപ്സ് (34), മാർക് ചാപ്മാൻ (21) എന്നിവരും ന്യൂസിലൻഡ് നിരയിൽ തിളങ്ങി. അരങ്ങേറ്റ മത്സരത്തിനായി ഇറങ്ങിയ ഹർഷൽ പട്ടേൽ ഇന്ത്യക്കായി മികച്ച പ്രകടനമാണ് നടത്തിയത്. നാലോവറിൽ 25 റൺസ് വഴങ്ങി രണ്ട് വിക്കറ്റെടുത്തു. പന്തെറിഞ്ഞവരെല്ലാം ഇന്ത്യക്കായി ഓരോ വിക്കറ്റ് വീഴ്ത്തി. 19 റൺസ് മാത്രം വഴങ്ങി ഒരു വിക്കറ്റെടുത്ത അശ്വിൻ മികച്ച പ്രകടനം തുടർന്നു.
